Rev 13 | GbrGAW | STEP | Ma gye nyawan-nyawan ho kwoi gmi ɓe n nuwan-yakwo, n Ina aye awyebwo nyayi kakpe n amwayi ngun awo n a rawani n gun awoyi kun n kwo amwayi ngun awo, N na bara kugya nya aye yi kakpe n kwo atukwo doho-dohoi n ɓa mi kwoi sa Shekwoyi ye n cegyei n na akmiyi.

Revelation of John 13

Nyawan-nyawan Aɓo Wowo

1 Ma gye nyawan-nyawan ho kwoi gmi ɓe n nuwan-yakwo, n Ina aye awyebwo nyayi kakpe n amwayi ngun awo n a rawani n gun awoyi kun n kwo amwayi ngun awo, N na bara kugya nya aye yi kakpe n kwo atukwo doho-dohoi n ɓa mi kwoi sa Shekwoyi ye n cegyei n na akmiyi. 2 Nyawan-nyawanye wu ngye nakmi, ama n apitai wu ngye bear nya, n gaba, egbe yi gyi, Dragon kwa gawo wo iko, n esushinkpegye yi, n begyi dnagmayi. 3 Ma gye owo tukwo gmanyi n ciyitu, nkwo ta shan ɓin, ama, eciyi ho kwa ɓi. Ceʼa wo anyi vinya ntu n wo a tnu-tnu awo-woi ɓo n wo zhin nyi aza ɓa vi Nyawan-nyawan yi n dnai. 4 Ɓa ga Dragon mwa-mwa, ntuge wa gawo ikoyi pya, ɓai ga nyawan-nyawanyi mwa-mwa, ɓai gna, “Oza lo n kni bwa yi nu ngye owoʼa? Nkado ɓa mi wa sunkun n owo yiʼa?”

5 Nna vun Dragon ho wa ga nyawan-nyawan kala n ge wo sa Dagayi eye n wyebwoyi, wa gawo iko wa gyi ebe tu n anyi tukwo apya shinyi cei aba. 6 N sai vinya wa tu Shekwoyi eye cegye n wo aduwa nyakunyi n azayi vinya nɓafi n eshe. 7 Dragon wa gawo iko wa sunkun n Shekwoyi azayi, wa gyi nasara nɓa tukwo, wa gyi ebe tu n na anyi tukwo vinya, n na abyei vinya, n na anyi. 8 A zanyikwoci vinya, na ato n ɓa aye yi kafi n kugya wu-wuyi Littafi wye-wyeyi nya kafin anyi zhi san, ɓa ga Nyawan-nyawan nukwoyi mwa-mwa.

9 Ozaho-zahoyi n wo n na atnubua yi, wo la tnubua kna peceye. 10 Shekwoyi aza n na ɓai zhi n kurkuku ɓo, aɓei wanɓa, ai lo n ɓai, aza n na n ɓai zhi n efi ɓo aɓei wuɓa, Amma fyeto wo ednan, gama efye sa nyi hankuri nya n bugba kalayi.

11 Nnavun magye nyafanya ho, kwoyi gmi n ekni, n na amwayi ɓiyi ngun aba, ngye kugya, n begye yakwoi ngye Dragon. 12 Wa lo tnu-tnu n nyawan-nyawan ikoyi n eci n lawo ɓinyi, n wo ye anyi vinya ɓa ga wo mwa-mwa nyi. 13 Wo ɓei zhin aɓo wo-woyi, woi zhin ena kwoi kaya ɓe nshe zaho-zahoi woi gye. 14 Wa zhin aɓo awo-woyi ye wo ɓei mi wa dna aza kwoce n na aba vinya, wo ɓei mi woi zhin aɓo a wowoi ye esa vinya n Nyawan-nyawan kmisunyi gni woi gye wo. Waga aza wyidna n na anyi nge ɓa zhin Nyawan-nyawan kmisunyi dogbe, n na ɓei la wo wu waje lakala nyi. 15 A gawo izini nge wo ga zazhi-zhinye esun wa zhinkwo kwa da ɓeda. Nnavun nya zhin-zhinye kwa ga wyidna ge oza n wo to ga kwo mwamwan wafi.

16 Wa ga gbe, dnagmayi n nawyi yi, nyabwayi n sanyi, fyenu n dagayi vinya ge aku eze tu zaho-zahoi n bwaizhe, kwo n nyikunmi. 17 Zahozahoyi ta bwa tnu-tnu, kwo wa si nyaho-nyahoyi n gni kwoho n tna tuze yin, n kwo nu zhin Nyawan-nyawan yi eye, kwo owo eye tuze. 18 Oɓo ɓednayi nyi sai oza zhin nubo nu kpa oza kpekwoye. Aza n ɓaɓa mi ɓa zhinkwo awyega okwo nu zhin tnanyi-tnanyi a ku ngun ata (666) wato tagyi tnanyi n cei kpe shi tnanyi cei tnanyi.